Oro: hulandesnan karibense ku ta destaká na Hulanda

E siman aki den Oro, e artista Stanley Clementina ta destaká aki na Hulanda, diseñadó David Paulus ta bèk for di Curacao Fashion Week, e ta hopi satisfecho i e artista plástiko Francis Sling ta tene su promé eksposishon. I naturalmente notisia farandulero.
Stanley Clementina alias 'Pure the artist', ta kuminsá hasi músika for di momentu ku e tabata mucha na Kòrsou. Na edat di 9 aña el a kuminsá kanta den koro di misa i ta skibi un piesa ku e tempu ei a bira popular:"Dia Kristu bini". Na 1986 e ta yega Hulanda i ta hañ'é envolví den kantidat di proyekto musikal i ta drenta konservatorio i ta gradua ku 2 diploma. Awendia Stanley Clementina ta traha den kantidat di proyekto, e ta dosente na conservatorio na Amsterdam i e tin su porpio grupo di gospel.
Diseñadó David Paulus
E diseñadó di moda David Paulus ta orguyoso di a partisipá na Curacao Fashion Week.
David tabata invitá pa partisipá na e promé evento di moda internashonal na Kòrsou. Tabata un bon eksperensha pa e komo diseñadó. David Paulas a haña e oportunidat di traha ku traha ku modelonan lokal di Kòrsou, loke a dun'e un sintimentu di orguyo. Tambe e ta'tin e oportunidat pa papia ku medionan di komunikashon na su isla natal. Durante e fashion week na Kòrsou, David Paulus a presentá su kolekshon ku a hiba e tema 'The Psycho collection'.
Francis Sling
'Happy Ending' ta título di e promé eksposishon di Francis Sling den kua el a eksponé pinturanan ku ta trata e tema felisidat. Sling a bin ku e tema aki pasombra e ta kere ku nos tin ku buska felisidat den kosnan chikí. Lastimamente e esksposishon a dura un dia só. Pero no ta e úniko momentu ku e Sling ta eksponé e aña aki. Lo por mira su pinturanan entre otro durante e eksposishon Rout d' North na Rotterdam i na festival Keti Koti.
Presentashon: Goriaka Maal

Oro ta e rubrika di farandula di Wereldomroep tokante hulandesnan karibense ku ta destaká na Hulanda.
OJO: nos ta apresia bo reakshon, por manda esaki na aworaki@rnw.nl i menshoná nòmber di e rubrika.