Boletin di 29 di yüni 2012

Krítikanan di Tweede Kamer no ta imprenshoná Rutte. Promé minister Rutte no ta masha bou di impreshon di e krítikanan riba su ròl durante e negosashonnan tokante euro. Hefenan di gobièrnu di paisnan di euro a yega na un akuerdo marduga k'a pasa tokante supersivishon konhunto riba bankonan. E mes ora ku esaki tei, bankonan spañó ku ta den problema por haña sosten for di e fondo di emergensha. Un gran parti parlamentu hulandes ta kontentu ku e resultado, pero nan ta reprochá Rutte ku el a bai mas leu ku loke e tabata ke. Rutte a bisa ku 'e problemanan di bankonan spañó tabata menasá di bira asina grandi ku tabata eksisti e riesgo ku ekonomia spañó lo a kai den otro por kompleto." Den su komentario riba e reakshonnan for di Den Haag el a desmentí ku el a kambia di idea drástikamente.

Marina terminá sekuestro riba laman na Somalia
Marina hulandes a kaba ku un sekuestro riba un boto dilanti kosta di Somalia. A detené algun pirata. A hiba tripulashon di e barku na un kaminda mas seif. E fregata hulandes tabatin dos dia ta buska e boto sekuestrá riba laman árabe i Golfo di Aden. For di luna pasa Hulanda ta partisipá na na e mishon anti pirata di OTAN den bisendario di Somalia.

Viktoria pa Obama
Presidente merikano Barack Obama ta yama e desishon di Korte Supremo tokante su lei di seguro médiko un viktoria pa tur merikano. Ayera Korte Supremo a disidí ku e lei tantu kwestioná no ta impugna na konstitushon merikano. Un 30 mion merikano no tin seguro médiko. E kandidato Republikano Mitt Romney a bisa kaba ku si e bira presidente e ta bolbe reboka e lei. Sinku di e nuebe wesnan di Korte Supremo a sostené e lei, kuater a vota kontra. E desishon di Korte Supremo ta un viktoria pa Obama.

Un persona a pèrdè su bida den kandela di boske
E kandelanan di boske den e estado merikano Colorado e kousa morto di un persona. Polis a deskubri un kurpa sin bida den un di e 350 kasnan ku a kima por kompleto. Dos persona tabata pèrdi kaba den e region. E kandelanan a destruwi te k'awor 67 kilometer kuadrá di naturalesa. Algun diesmil persona na Colorado a hui òf a keda evakuá. Presidente Obama a dekretá estado di emergensha pa e region. Awor ku bientu ta supla menos fuerte, kuerponan di bombero ta spera ku nan lo por kombati e kandela mas mihó.

Mucha hòmber asesiná na Puerto Rico
Na Puerto Rico a mata un mucha hòmber hulandes. Nan a tire mata den su outo. E malechor tabata interesá den e outo di e mucha hòmber. E hóben tabata biba ku su mama na Puerto Rico. Segun De Telegraaf e lo a bula otro siman pa Hulanda pa e bai biba seka su tata pa e bai studia. Media lokal ta bisa ku entre tantu a detené e malechor. Tin chèns ku lo kondené na kastigu di bida.

Bruder sospechá di morto di 37 hóben
Ministerio Públiko ta sospechá un di e brudernan di internat Sint Joseph na Heel di ta responsabel pa morto di 37 mucha hòmber bou di 21 aña den e periodo di 1952 pa 1954. E bruder aki, ku tabata yama Andreas tabata traha e temp'ei komo úniko persona ku tabata kwida e muchanan. E muchanan tabatin mester di kwido. Na 1959 obispado a tende ku e muchanan a muri bou di sirkumstanshanan straño pero nan'n  hasi nada. Ministerio Públiko no ta kuminsa ku un investigashon si pasó e termino pa hasi esaki ya a pasa, ademas e bruder konserni a fayese.

Siria a manda tanki pa fronter di Turkia
Un militar haltu di resistensha na Siria ta bisa ku e régimen di e pais a manda 170 tanki di guera pa frontera di Turkia. Segun e militar no ta kla si esaki a sosode pa motibu di e tenshon entre Siria i Turkia òf si ta bai huza e tankinan pa ataká suidatnan ku ta resistí kontra e régimen di Siria. E tenshon entre Siria i Turkia a subi for di siman pasa ora ku Siria a tira un avion di guera di Turkia. Ayera ehersito di Turkia a manda trupanan pa reforsá na frontera.

Korte Supremo merikano a duna hòmber ku a gaña tokante su kondekorashon rason
Si merikanonan gaña bisa ku nan a risibí un kondekorashon militar esaki ta kai bou di libertat di ekspreshon. Korte Supremo ta haña esaki mas importante ku protekshon di integridat di kondekorashonnan militar i heroénan di guera. Pero si un persona gaña tokante un kondekorashon militar pa e gana sèn kune, esei si ta keda kastigabel. E veredikto aki ta un viktoria pa un hòmber di California, ku a ga`na ku e tin un Medal of Honor, e kondekorashon militar merikano mas haltu. E hòmber mester a paga un but di 5000 di dòler i un kastigu di trabou di 400 ora. Korte Supremo a anikilá e sentensia.

Skol a kita mucha for di skol
 Na Bélgika nan a kita dos mucha muhé for di skol ku a molestia un otro mucha muhé di 13 aña. E mucha muhénan a ranká kabei di e otro mucha muhé i filma esaki. Tambe nn a zundre i maltrate. Despues e dos damsitanan a pone e vidio riba Youtube, pero e kanal a kita esaki for di ínternèt. Mayornan di e víktima a haña e vidio pa mira tòg. Mama di e víktima a pone e imáhenan riba su página di Facebook pa huntu ku su yu muhé e pidi atenshon pa pèstermentu bou di hóben. Entre tantu a komparti e vidio riba Facebook mas 60.000 be.

Orkesta venesolano ta risibí premio hulandes
E orkesta Simón Bolívar Symphony Orchestra di Venesuela risibi e kondekorashon De Ovatie. Un premio musikal otorga pa e asusashon di gerenshanan di teatro i salanan di konsierto pa un orkesta o grupo musikal ku a destaká riba un tarima hulandes. Hurado a duna e orkesta venesolano ku ta konsistí di 150 músiko e premio sin ni sikiera skuche toka. E Simón Bolívar Symphony Orchestra ta un orkesta ku ta parti di un programa edukativo pa mucha venesolano.

Deporte
E ekipo di sòftbol hulandes a kuminsa e di shete edishon di e tureno pa kopa mundial na Oklahoma bon. Oraño a derotá Canada ku 7 pa 6. Awe Hulanda, aktual gampion oropeo ta hunga kontra Brazil i Puerto Rico.

Pronóstiko di tempu
Fèltnan di nubia pero tambe temporada di solo.Pero tin chèns tambe riba áwaseru. Te hasta malwer. E temperatura ta 20 grado na kosta i 25 grado den e parti ost. Mayan e wer ta mas o menos mes kos.