Jetro Willems: Lo mi ta kontentu si Spaña bira kampion”

Ora ku a bira kla ku e onsena hulandes durante e Kampeonato Oropeo (KO) aki lo no yega mas leu ku e fase di grupo, Jetro Willems (18), hungadó seka di PSV i e hungadó di mas hóben di Oranje, mes ora a bula bai su isla natal Kòrsou. Pa sosegá, kombersá ku su famia i espesialmente pa no pensa riba futbòl un ratu. “Mi no a mishi ku niun bala último simannan.”
Djabièrnè atardi dos or. Jetro a lanta algun ora pasá i ta sinta den stupi di kas di su wela na Mahuma. “Último nuebe dia mi a sali tur anochi. Saka poko strès. Mi a pasa den poko siman pisá.” E fulbolista hoben ainda ta hopi impreshoná di su aventura di KO. “Tabata masha great pa pasa aden. Ami komo mucha chiki mei mei di tur e hòmbernan ei ku ta e mihónan di Oropa. Mi ta kontentu ku nan tabata akseptá mi sí. Nos tur tabatin ún meta: gana. I si bo konsentrá kompletamente riba algu ku bo ke di bèrdè mes, tin be bo ta logra tambe.”
Ko’i kèns den prensa
E biaha aki suèrtè no tabata ku Hulanda. Despues di e tres weganan den fase di grupo kaba e onsena por a bai kas bèk. “Ainda esaki ta hasi doló. Naturalmente nos por a hunga mihó pero nos a hasi e mihó ku nos tabata por sigur. Awendia tur hende ta kere ku ta nan a inventá futbòl, ma ora bo mes tin ku para den e vèlt ei ta henteramente un otro asuntu.”
Tambe Jetro ta masha malkontentu ku media hulandes. “Nan a skibi un kantidat di ko’i kens tokante nos tim: ku konstantemente nos tabata pleita i ku ta p’esei nos no a hunga bon. Nada di esaki no ta bèrdat. Mi por a anda masha bon ku tur hende. Ma ku esaki nan a purba kibra nos sí. Mi no ta bisa ku esaki tabata e motibu prinsipal, ma el a hunga un ròl sí.”
Durante e promé siman di su vakashon na Kòrsou Willems a tende ku Bert van Marwijk a entregá su retiro komo bondscoach di Onsena Hulandes. “Mi ta haña masha lástima. E ta esun ku a perkurá pa mi por hunga i ademas e ta masha bon trainer. Ta tristu ku ta konden’é pa loke ku a pasa.”
Mal pèrdèdó
Durante e final djadumingu entre Spaña i Italia Jetro lo no wak televishon. “For di dia ku nos a ked’afó mi no a wak niun wega mas. Mi no gusta pèrdè, ni sikiera un wega di ganzenbord. Ke men djadumingu mi ta preferá keda kas drumi. Mi ta drumi durante henter e wega anto despues lo mi tende e resultado. Lo mi ta mas kontentu si Spaña gana.”
For di 12 di yüli e futbolista hóben ta kuminsá su di dos temporada seka PSV i e lo bai su apartamentu na Eindhoven bèk. “E bida ta kuminsá atrobe i for di e ora ei lo mi pensa solamente riba futbòl. Ma aworaki ainda nò. Último simannan mi no a mishi ku niun bala.”
Berdadero antiano
Plannan fiho pa futuro Willems no tin. Ounke e ta spera di por nifiká algu pa su isla natal. “Poko tempu ei mi tabata na un wega entre Seru Fortuna i Barber. Einan mi a mira ku aki tin hopi potenshal. Mi ta spera ku un dia mi por nifiká algu pa e talentonan aki. Pasobra ounke nan ta bisa ku mi ta un hulandes, mi ta mira mi mes komo un antiano ku a hunga den onsena hulandes. Kòrsou ta keda mi kas.”