VVD ta mira posibilidat pa limitá establesimentu di antiano

Mester hasi binimentu di hende for di Kòrsou, St. Maarten i Aruba ku ke bin Hulanda mas difisil. Awe VVD a entrega un inisiativa di lei, ku el a anunsiá anteriormente, pa regla atmishon di habitantenan di e islanan menshoná. Bosero di asuntunan antiano André Bosman ta kere ku parlamentu lo asepta e lei sin masha problema.
No ta promé be ku partidonan polítiko hulandes a purba di limitá imigrashon di habitantenan di otro parti di Reino pa Hulanda. A purba hasi esaki pa medio di e asina yamá Rijskwet Personenverkeer. Pero Kòrsou, Aruba i St. Maarten a protestá fuertemente kontra esaki. Ta pesei VVD ta purba awor via di un lei hulandes. "Den Statüt tur pais tin e derechi pa stipulá su mes reglanan pa regula tráfiko di persona", Bosman ta bisa den entrevista ku Wereldomroep. Ta trata solamente di reglanan di establesimentu.
Bosman no ta spera masha resistensha den Tweede Kamer kontra su propisishon di lei: "E ta un kos masha husto. Habitantenan di e islanan ta bonbiní si nan por algu i si nan tin ambishon." Pero pa hendenan ku no tin masha perspektiva, ku no ta dominá hulandes i ku lo tin difikultat riba merkado di trabou, no tin luga. "No ta un kestion di isolashon ni di deskriminashon." E inisiativa di lei ta bai Raad van State promé i despues Tweede Kamer ta trata e proposishon di lei. Bosman no ke antisipá riba esaki, pero e ta kere ku hopi partido lo sostené e lei.
Vínkulo ekonómiko
Raymond Labad, presidente di MAAPP ta wak e kos totalmente otro. E no ta mira un diferensha entre e proposishon di VVD i e promé intentonan pa limitá atmishon di antianonan. "Kon ku bo mire, ta e mesun kos." E reprosidat ku VVD ta referí na dje, pasobra e paisnan karibense tambe tin restrikshon pa establesimentu di hulandesnan oropeo, tin un motibu ekonómiko pa protehá e komunidatnan chiki di e islanan. "Mi tampoko no por estblese mi mes na un di e islanan hulandes, Waddeneilanden, si mi no tin un laso ekonómiko ku e isla.
E inisiativa di VVD ta un intento nobo pa krea dos sort'i hulandes, asina Labad ta bisa. "Lareina a bisa señora Verdonk na 2006 kaba ku ta un sort'i hulandes tin." Si parlamentu hulandes aseptá e lei di VVD, MAAPP lo tuma sigiente paso kontra dje lei, asina presidente Labad ta anunsiá, manera Korte Oropeo o Nashonnan Uní.