CFT ta duna gobièrnu 7 día di tempu

WILLEMSTAD - E medídanan finansiero ku gobièrnu a proponé atrabes di ahustenan den e presupuesto supletorio 2012 te ainda no ta sufisiente pa haña aprobashon di e kolegio di supervishon finansiero CFT.
Asina tin pará den un karta fechá dia 29 di Juni 2012 ku CFT a manda pa gobièrnu i tambe parlamentu di Kòrsou. E kolegio ta di opinion ku e presupuesto 2012 inkluyendo e ahustenan te ainda no ta sufisiente pa kumpli ku e normanan konforme artíkulo 15 di e Lei di Konsenso di Reino.
Konseho
CFT ta konsehá gobièrnu pa tuma medídanan adishonal pa balansá e défisit riba presupuesto 2012 di 55 mion florin i alabes kompensá e défisitnan di añanan anterior di 98 mion florin. Total gobièrnu di Kòrsou mester sòru pa sera un buraku di 153 mion florin.
Shete día
Konforme artikulo 12.5 di e Lei di Konsenso di Reino, gobièrnu tin shete día di tempu pa reakshoná riba e karta di CFT. Den kaso ku gobièrnu no reakshoná satisfaktoriamente i CFT mantené su opinion ku e presupuesto no ta kumpli ku e normanan di artikulo 15, CFT lo pone Konseho di Minister di Reino na altura di esaki.
E notifikashon aki lo por bai kompañá ku un konseho motivá pa duna un instrukshon na gobiernu di Kòrsou.