Elia Isenia ta selebrá Dia di Bandera na Hulanda

WILLEMSTAD – Djadumingu dia 8 di yüli lo selebrá Dia di Bandera na Gabinete di Minister Plenipotensiario di Kòrsou (KGMC), na Den Haag. E artista konosí Elia Isenia di Kòrsou lo ta presente na e selebrashon.
Isenia ta konosedó di kultura di Kòrsou i kontadó di kuenta. Ademas e ta skibi poema, e ta deklamá, e ta aktris i e ta kanta. Na 1991 a elegí Elia Isenia komo promé Reina di Tumba di Kòrsou ku su tumba ganadó ‘Pia pia man’e trambia’. Na 2010 atrobe el a bira Reina di Tumba.
Isenia ta keda Hulanda te medio yüli i lo duna un serie di presentason kultural den diferente siudat hulandes ku e meta di promové kultura di Kòrsou. Kumbre lo ta selebrashon di Dia di Bandera na Den Haag kaminda Isenia lo entretené públiko ku kantamentu i workshop kultural.