Constancia lo no basilá pa kita lisensia di importadó di remedi

WILLEMSTAD - Asosiashon di importadónan di produktonan farmaseutiko (VIPP) a pèrde kaso den korte ku a entamá kontra di gobièrnu di Kòrsou pa ku introdukshon di preis máksimo riba importashon di remedi. Asina Minister Jacinta Schoop-Constancia di Salubridat ta anunsiá.
Segun e mandatario, den su veredikto wes a tene kuenta ku interés general i a ordená importadónan di remedi pa kumpli ku e dekreto gubernamental di preis máksimo pa importashon di remedi ku a drenta na vigor dia promé di Yuli último.
Stòk bieu
Gobièrnu debidamente a tene kuenta ku stòk bieu di remedi serka e importadónan kaminda ta duna nan chèns te ku promé di Sèptèmber prókimo pa sali for di nan stòk bieu. Pues e argumentu ku importadónan ta usa ku lo pèrde sèn riba stòk bieu no ta unu bálido.
Atvertensia
Minister Jacinta Schoop-Constancia tabata hopi enfátiko den un entrevista na Radio Deltha: “Si importadónan di remedi no kumpli ku e veredikto di wes, lo mi hasi uso di mi outoridat komo minister pa kita lisensia di esnan ku ta keda sin importá sierto remedi i konsekuentemente krea un situashon di skarsedat di remedi”.