Oumentá eksportashon ta e solushon

WILLEMSTAD –  Segun Kámara di Komèrsio i Indústria di Kòrsou (KKN) finansiamentu di kresementu di sektor kolektivo a kosto di sektornan di eksportashon lo hinka esakinan den problema. Ku esaki KKN ta uni su mes ne preokupashon ekspresá resientemente pa Banko Sentral di Kòrsou i St. Maarten
KKN ta mira un desekilibrio fundamental den nos ekonomia. Di un banda, e sektornan eksportadó, ku eksepshon di turismo, ta mustra un bahada. Na e otro banda tin un kresementu di e sektornan no-eksportadó, den kua e sektor kolektivo (gobièrnu) ta hunga un papel importante.
Balansa di pago
E desaroyo di e balansa di pago ta asina desekilibrá, ku no por papia di un desaroyo ekonómiko duradero den e último añanan. E aktual problemanan finansiero den presupuesto di gobièrnu i e seguridat sosial ta pidi pa un solushon ku ta tene kuenta ku e relashon entre e sektornan eksportadó i no-eksportadó i e situashon riba e balansa di pago.
Solushon
No por papia di un maneho duradero ora debilitá e potensia di kresementu di eksportashon atraves di oumento di impuesto i prima. Un relashon balansá entre e sektornan eksportadó i e sektornan no-eksportadó den e situashon aktual ta rekerí ku ta moderá e gastunan di e sektor kolektivo i spesialmente di e kuido di salú. Simultáneamente mester desaroyá un maneho ku ta hasi finansiamentu di e sektor kolektivo ménos dependiente di e sektornan eksportadó.
Na opinion di Kámara di Komèrsio i Indústria parti importante di e solushon yama eksportashon, eksportashon, eksportashon.