Bestuurscollege di Boneiru no ta hasi nada ku krítika riba eksportashon di buriku
No opstante pregunta den parlamentu hulandes ku presidente di frakshon Marianne Thieme di Partij voor de Dieren (PvdD) a hasi djamars 17 di yüli i e petishon ku e sentro di akohida di buriku na Boneiru a hasi pa trata di para e plan pa transportá buriku, e plan di gobièrnu di Boneiru ta sigui. Asina diputado Burney Elhage ta bisa.
“Mandatario mester tin kurashi di tuma i karga nan responsabilidat. Ku ayudo di un organisashon hulandes islanan Turks i Caicos tambe a logra na 2008 pa hiba nan surplus di buriku pa otro isla”, Elhage ta bisa. “Ke men pa Boneiru tambe esaki lo ta un bon solushon.”
Surplus di buriku
James Kroon, diputado di Bestuurscollege di Boneiru na yüni a anunsiá ku e ke manda buriku di Boneiru Haiti. Ei nan ta usa buriku pa transpòrt komo ku hopi kaminda na Haiti a daña for di e temblor di yanüari 2010.
Segun Kroon Boneiru pa añanan largu ta lucha ku un kantidat grandi di buriku ku ta kana lòs i ku ta trese situashon peligroso den trafiko i ta daña naturalesa. Ademas hopi buriku tur aña ta muri di aksidente di tráfiko, malesa, maltrato i set.
Futuro deplorabel
Donkey Sanctuary, e sentro di akohida di buriku na Boneiru, mas ku binti aña ta duna akohida na un gran kantidat di buriku den un parke reservá speshal. Direktor Marina Melis ta kontra e plannan di Kroon. “E plan ta kompletamente deskabesá i no ta na bienestar di bestia. Un buriku ku nunka no a mara bo no por djis bark’e numa.”, Melis ta bisa. “Ademas na Haiti e burikunan lo tin un futuro deplorabel pasobra nada no ta konosí tokante nan kuido einan. E plan aki ta kompletamente ko’i kèns.”
Pa sostené su opinion Melis huntu ku e plataforma online Change.org a start un petishon pa salba e burikunan. “Entretantu nos a kolektá mas ku 10.500 firma di rònt mundu kaba. Bo no por keda sin konta ku esaki.”
Medida na bienestar di bestia
Marianne Thieme, presidente di frakshon di PvdD tambe tin pregunta seka e plan boneriano Esaki a sali den e preguntanan den parlamentu hulandes ku djamars 17 di yüli el a hasi na minister di Asuntunan Interior i Relashonnan den Reino Liesbeth Spies (CDA) i na sekretario di estado di Asuntanan Ekonómiko Henk Bleker. Thieme ke sa ta eksaktamente unda e burikunan ta bai, kon ta garantisá e medidanan na bienestar di bestia, kon i pa kiko ta bai usa nan i kuantu plaka Boneiru ta haña pa e burikunan. Ademas e polítiko ta pensa ku tin medida miho pa bienestar di bestia pa trata e problemasia di buriku.
Melis ta di akuerdo i a pensa un otro plan. E sentro di akohida di buriku mes ke bai fangu tur e burikunan i tuma tur yewa i yu di buriku den e resevashon. Lo kapa tur buriku machu i despues laga nan kana liber riba e isla. “Esaki ta maksimalmente 75 buriku”, segun Melis, “i Boneiru ta basta grandi pa e kantidat aki.”
Barka ta nesesario
Segun Elhage e problema no ta asina fásil pa solushoná i barkamentu di un parti di e burikunan lo keda nesesario. E ta basa su mes riba un situashon komparabel ku ántes tabatin na islanan Turks i Caicos. “A lo largu ta Donkey Sanctuary di Hulanda a yuda barka un parti di e burikunan pa Haiti, Santo Domingo i Jamaica. Un otro parti di e burikunan a haña akohida den un parke reservá speshal i e burikunan machu ku a sobra a kapa i laga nan sali liber atrobe. Asina nos ke hasi na Boneiru tambe”, e diputado ta bisa “Niun ora so nos no a bisa ku nos ta bai barka tur buriku riba e isla manera loko.”