Schotte invitá na Weganan Olímpiko

WILLEMSTAD – Djamars 24 di yüli promé minister Gerrit Schotte a haña invitashon den e-mail di embahada britániko pa partisipá na Weganan Olimpiko na Londen. Asina su bosero Ramsey Soemanta ta konfirmá.
No ta kla si promé minister lo aseptá e invitashon. “E invitashon a kaba di drenta algun ora pasá i e weganan ta kuminsá djabièrnè, ke men minister ta den deliberashon tokante esaki ainda”, di akuerdo ku Soemanta. Mester tuma e desishon lihé si pasobra si Schotte bai lo e mester sali djaweps kaba. Soemanta ta bisa ku e ta ferwagt un kontesta awe.
Invitashon lat
Den e e-mail e embahador britániko ta pidi despensa ku a manda e invitashon asina lat. E embahada ta skibi ku ‘nan no tabata por otro pa motibu di e desishon lat di Komité Olímpiko Internashonal (IOC) pa atmití atleta kurasoleño bou di bandera di IOC na Weganan Olímpiko di 2012 na Londen’.