Deportista di Kòrsou sin pais pero orguyoso

Na Weganan Olímpiko na Londen lo tin tres deportista kurasoleño ku no por sali pa nan pais. Nan mester partisipá bou di bandera olímpiko.
Na Kòrsou tin hopi doló, tristesa i indignashon pa e pèrdida di derechonan olímpiko, espesialmente pasobra tempu ku Aruba a bira outónomo na 1986, e sí a haña pèrmit di lanta un propio komité olímpiko. Entre tantu IOC a kambia e reglanan.
Último dianan esaki a kousa konfushon, pero komo medida di transishon deportista antiano ku antes tabata sali pa Antia i ku no ke skohe pa Hulanda òf Aruba, por partisipá ún biaha mas na e Weganan, pero bou di e bandera neutral olímpiko.
Ken e atletanan aki ta, kiko ta nan chènsnan i kon nan ta haña pa hasi nan deporte bou di bandera olímpiko?
Lee-marvin Bonevacia (23)
El a kalifiká pa Weganan Olímpiko riba 400 meter durante Grand Prix di Medellin, Colombia ku un tempu di 45.77. Si el a skohe pa Hulanda ku e resultado aki riba su distansha, lo el a kue bròns fásilmente na Kampeonato Oropeo.
Na Willemstad Bonevacia ta miembro di e klup di atletismo Trupial, kuna di kasi tur talento di kore kurasoleño. E ta train na Puerto Rico kaminda e ta studia na Universidat del Este. Pa prepará pa Weganan Olímpiko el a train na Hulanda, na Papendal.
“Si mi pasa e rondanan preliminar tur kos ta posibel”, Lee-Marvin ta bisa ku hopi konfiansa. Aktualmente den rango mundial e ta na di 22 lugá. Luna pasá na e Enkuentro Internashonal di Atletismo na Luik el a sali di tres riba e distansha no masha komun di 300 meter, tras di Jonathan Bolée i Obakeng Ngwigwa di Botswana.
Reginald de Windt (28)
El a kalifiká pa e Weganan na Londen na e torneo di yudo panamerikano na Montreal na Canada. “Ami ta tur kla, pero na mi edat ta realistiko pa baha e ekspetativanan. Mi ta bai Londen pa gana maske ta dos be”, De Windt ta bisa.

Komo number 211 riba lista di rango mundial den e klase te 81 kilo e sa ku na Londen tin torneo pisa ta ward’é. E sa masha bon ku pasobra e no a skohe pa Hulanda, e por a probechá di e kuota kontinental faborabel, pero e no ke laga kita su orguyo di representá Kòrsou na Weganan Olímpiko. “Den mi karera di yudo mi mester a paga mi torneonan internashonal kasi kompletamente mi mes, awor ta sponser mi komo yudoka kurasoleño pa bai Londen.” E ta lombra di orguyo.
Philipine van Aanholt (20)
E ta zeil den klase Laser Radial. El a nase na Hulanda, pero a biba na Kòrsou henter su bida. Philipine ta desendiente di e dinastia di zeil Van Aanholt. Henter e famia ta zeil riba nivel internashonal. Tata Cor a zeil na Weganan Olímpiko na Sydney.
Na Kampeonato Mundial na mei na Boltenhagen, Alemania, Philipine a logra di kue un di e nuebe lugánan disponibel pa Londen. Su ambishon: “Partisipá na e Weganan, esei tabata e meta i m’a logra.”
“Mi ta 46 riba rango mundial”, e ta bisa ku hopi sentido pa proporshon, “pero zeil ta un deporte di eksperiensha, mi tempu lo yega ainda. “Semper m’a sali pa Kòrsou. Mi no a skohe pa Hulanda pasobra mi ker a sali pa mi pais un biaha mas, awor ku ta posibel ainda.” Ku e no ker a skohe pa Hulanda pasobra ei Marit Bouwmeester – e number un mundial – ta strob’é, e no ke tende: “No lubidá ku no ta pòrnada a invitá mi; mi mester a kalifiká sí!”
Ketu ketu Van Aanholt ta spera ku lo lag’e karga e bandera olímpiko, awe den e seremonia di apertura. “Mi ta e úniko mucha muhé i kisas Reginald i Lee-marvin ta asina kabayero ku nan ta duna ami e honor”, e ta hari.