Godett: 'Tur opshon ta habrí'

“Si bo por demostrá nos riba papel ku bo tin sostén di 10 asiento, nos lo bai mesa di negosashon pa forma un gobièrnu”. Esaki ta e mensahe ku lider polítiko Anthony Godett a duna na e partidonan di tantu koalishon komo di oposishon ku a aserká FOL pa forma un gobièrnu nobo.
Awe mainta direktiva di partido Frente Obrero i Liberashon 30 di mei (FOL) a tene un reunion kaminda a informá su miembresía tokante e ultimo desaroyonan riba tereno polítiko. E tema prinsipal tabata e posishon di FOL pa ku partisipashon den un gobièrnu nobo
Koalishon i oposishon
Godett a konfirmá ku e lidernan di tantu MFK, MAN komo di Pueblo Soberano a aserká FOL pa forma parti di gabinete Schotte. Pero e negosashonnan ta wantá momentaneamente pa motibu ku e partidonan di koalishon no por a duna un garantía ku ne momentu aki nan ta disponé di un sostén di 10 asiento.
Di otro banda FOL tambe a keda aserká pa lider politiko di PAR, Emily de Jongh-Elhage, pa forma un gobièrnu nobo. Godett a duna PAR e mesun mensahe, esta ku e ta dispuesto pa negoshá basta ku PAR por garantisá un sostén di 10 asiento.
No tin preferensia
Riba nos pregunta kua ta e preferensia di FOL pa ku formashon di un gobièrnu nobo, Godett a bisa ku e no tin preferensia. Pues sea ta un gobièrnu ku PAR of un gobièrnu ku MFK e no ta mira esaki komo un punto importante. “Loke ta importante pa nos ta nos puntonan di salida. Nos ta bai den gobièrnu ku esunnan ku por duna nos e garantía ku ta akseptá nos puntonan di akshon”.
Puntonan di akshon
Un di e puntonan di akshon ku sigur FOL ke akseptashon p'é pa e por drenta kualke gobièrnu ta e punto di asuntunan sosial. Segun Godett e punto aki ta hopi importante pa e partido oraño mirando e nesesidat agudo ku tin aktualmente den nos komunidat pa atendé ku problemanan sosial.
Pa loke ta e repartishon di karteranan i e puesto di minister ku FOL lo ke haña, Godett a bisa ku esaki ta hopi tempran pa papia riba dje ya ku te ainda no tin negosashonnan ta tumando lugá.