Resúmen di korant 1 di ougùstùs 2012

E ruta aéreo Paramaribo-Schiphol tabata e trayekto di narkotráfiko mas kubrí na mundu aña pasá, o sea na 2011, asina Konseho di Oropa a notifiká resientemente. Sinembargo no tin masha droga ta sali for di Sürnam na airopuerto Johan Adolf Pengel, esta relativamente antó, asina Trouw ta informá. Hulanda ta aportá ku 200.000 euro pa aña n'e kòntròlnan na e airopuerto, mió konosí komo Zanderij. Pero tin muchu mas lote di droga ta pasa pa Oropa i otro pais via kònteiner di barku.

Duana ta impotente, pasó ta ún skèner bieu so tin anto ademas no tin sufisiente personal tampoko. Nunka no a yega di interseptá droga na haf di Paramaribo. Un rapòrt merikanu ta bisa ku esei tin di aber ku korupshon vinkulá ku droga, ku ta reina den seno di gobièrnu sürnam.

Mañan lo trese klaridat riba e kantidat di partido ku elektorado na Boneiru, Sint Eustatius i Saba por vota p'e dia 12 di sèptèmber próksimo. Mañan Konseho elektoral ta partisipá number di lista. De Volkskrant ta informá ku 22 partido por partisipá na elekshon di miembro nobo pa Tweede Kamer, o sea parlamentu na Hulanda. E dies partidonan ku ta den parlamentu aktualmente ta partisipá tur kaminda, ma loke ta pasa ta ku e partidonan nobo mester a kolektá 30 deklarashon di respaldo na kada distrito elektoral, anto gran parti dje 12 partidonan nobo no a logr'esei na e asina yamá Islanan BES.

"Un medida burokrátiko ridíkulo", asina Jan Nagel di partido 50Plus ta yama e kondishon. Konseho elektoral a anunsiá wèl ku su partido a risibí sufisiente apoyo na Boneiru, ma Nagel no ta mashá trankil, pasó si un hende a respaldá dos partido, anto e or'ei ainda e por kai afó.

Piratenpartij, ku no a alkansá drèmpi elektoral n'e islanan hulandes, no ke lébumai ainda: "Piratanan ta hisa bela bai Boneiru", asina e partido a twitter, ma djis despues el a informá ku entrega dje formularionan a frakasá, ya ku e persona ku a pasa entregá nan tabatin shòrt bistí.

Testigunan den e kaso kontra Julio Poch, e piloto hulandes argentino, a matisá nan deklarashonnan inkriminante fe un añ'i mei pasá, asina a resultá for di dokumentonan hurídiko ku diario Trouw tin den su poder. E matutino ta skibi mas aleu ku Hustisia argentino ke tene e sospechoso den aresto preventivo tòg basá riba otro informashon.

Kasi tres aña pasá a detené Poch na Spaña. Despues a ekstradit'é pa Argentina, ya ku ta sospech'é di ta kómplise dje asina yamá buelonan di morto. Tempu dje régimen militar n'e pais, tabata pusha oponentenan for di avion, laga nan kai den laman entre 1976 i 1983. Algun kolega a bisa ku Poch a konta nan e historia ei durante un komementu na Bali, Indonesia. El a bisa nan ku e tambe a koperá ku dùmpment'i hende den laman. Awor ta resultá ku koleganan di Poch a adaptá nan testimonio.

E polítiko spañó yamá Angel Carromero a konfirmá vershon di gobièrnu kubano, ku ta bisa ku disidente Oswaldo Payá a muri pa motibu djun desgrasia, asina ta pará awé entre otro den De Volkskrant. No tabatin otro outo envolví den e aksidente, kontrario na loke famia dje defuntu ta konta.  "M'a wanta brek pasó m'a mir'un buraku riba kaminda", asina Carromero ta bisa den un mensahe riba vidio. Esei a pon'é pèrdè poder riba stürwil, ku konsekuensha k'e outo a kita for di kaminda.

Hustisia kubano ta akusá e polítiko di homisidio. Pa esei e por risibí kastigu di prizòn di dies aña. Carromero ta spera ku komunidat internashonal por sak'é for di Cuba, pa no uza e desgrasia pa metanan polítiko.

Preis di oro ta haltu asina ta ku kentura pa oro ta subiendo na Haiti, asina De Volkskrant ta skibi. Den nòrt di Haiti tin oro bou di tera na balor di miares. Ta teme ku esaki lo no benefisiá e haitianu komun i koriente i ku empresanan strañero so lo probechá dje metal presioso. Promé minister Martelly ta anhelá invershon di pais strañero na su teritorio. Su gobièrnu ta hasiendo palabrashon no mashá transparente ku kompanianan minero merikanu. Esaki apenas lo generá kupo di trabou p'e poblashon lokal, segun un ekonomista. Ta strañero spesialisá so ta haña trabou pa ekstraé oro na Haiti, asina e di.

Pa siña mucha respetá polis, nan mester kompañá nan durante warda, asina CDA ta trese dilanti. E partido ta sumamente entusiasmá ku e proyekto yamá 'politiekids', ku ta teniendo entre otro na Rotterdam i Amsterdam, asina ta pará den De Telegraaf. Mucha entre seis i dies aña di edat ta partisipá n'e projeyekto, ku vèst i pèchi bistí. Nan tin mag di kompañá shon polis ora duna esnan ku kometé delitu chikí 'un skual formal'. Sobretodo n'e barionan marginá, esaki por evitá hopi problema i miseria den futuro.