Boletin di notisia 1 di ougùstùs 2012

Awor ta 18 partido hulandes ta bai elekshon na tur distrito elektoral

Di e 22 partidonan ku ta partisipá na elekshon parlamentario hulandes dia 12 di sèptèmber, 18 ta hasi esei efektivamente na tur distrito elektoral, asina Konseho elektoral ta informá. Ayera Konseho elektoral a notifiká ku tabata trata di 15 partido, esaki pa motibu di e diferensha di ora ku region karibense. Piratenpartij, Nederland Lokaal i Anti Europa Partij tambe a logra almasená sufisiente firma na islanan BES pa por vota ayá pa nan.

FOL ta tene gobièrnu Schotte riba pia pa tanten
Situashon di gobièrnu di Kòrsou a bira mas delikadu ainda. Despues ku miembro di Staten Cleopa di MAN a hala atras djadumingu último, awor ta presidente di frakshon di MFK, Dean Rozier a duna di konosé ku e no ta respaldá e aktual koalishon mas. Promé minister Schotte a bisa, despues djun enkuentro ku gobernador Goedgedrag, ku lo e ofresé retiru di su gabinete ora ta sigur ku no tin sufisiente apoyo mas den parlamentu. Ma p'awóraki e ta sigui goberná ku sosten tolerante di FOL, ku tin ún asiento so den Staten.

Angúa atrobe den kuminda na bordo di avion
A bolbe topa ku angúa den kuminda di avion. Djaluna, o sea antayera, un pasahero a haña angúa den su pan den avion di Air Canada. Te asina leu ku ta konosí e kos no a heridá e pasahero. E avion tabata ehekutando un buelo lokal. No a bisa kuá empresa ta responsabel pa catering dje kuminda. E kompania di aviashon kanades a anunsiá ku lo agudisá medidanan di seguridat. Polis di Canada ta investigando e insidente. Dos siman pasá tambe a bai haña angúa den pan chikí ku a sirbi na bordo di Delta Airlines, riba buelonan di Amsterdam ku destinu pa siudatnan na Estados Unidos. Un pasahero a keda heridá or'el a dal un hap for di su pan.

Bringamentu barionan kristian sirio tambe awó
Pelea a estayá pa promé biá na dos bario kristian den sentro bieu di Damasko, kapital di Siria. Tin hopi hotèl den e barionan ei. Un organisashon sirio pa derechi di hende establesé na Londen ta informá ku ún militar di gobièrnu a peresé. Poko ten pasá ainda tabata tene manifestashon pro presidente Assad na barionan kristian. Situashon humanitario na Aleppo, e siudat mas grandi di Siria, ta birando pió dia pa dia. Trupanan di gobièrnu ta sitia dos bario ya ta 11 dia kaba. Riba YouTube a sali vidio di fusilamentu na Aleppo di kuater miembro di milisia ku ta bringa pa presidente Assad. Tambe por mira kurpa sin bida drumí riba otro na ward'i polis. Probablemente e hòmbernan ku nan a tira mata tabata pertenesé na grupo Shabbiha, un milisia simpatisante di gobièrnu. Ta konsiderá e milisia ei responsabel pa vários matansa na siudatnan sirio.

Abuzu mucha desabilitá mas i mas na Huizen
E kaso di akto inmoral na Huizen, provinsha Noord-Holland ta plamando. Un asistente di skol di 27 aña a atmití di a abuzá di hende mentalmente desabilitá tambe n'un fundashon kaminda e tabata traha. Supuestamente ta trata di dos víktima. E hòmber a guian nan kuater aña largu. Fe promé a sali na kla ku e asistente edukativo a abuzá di mucha den bisindario: seis alumno djun skol pa siegu i esnan ku bista defisiente, un mucha na scouting i un otro n'un krèsh na Huizen. Polis ta investigando e hòmber detayadamente.

Schippers ta blo bòltu den sektor médiko
Genetista, dòkter di mucha i pashènt ta hasi un yamamentu na minister Schippers di Salubridat Públiko pa dialogá riba opshonnan finansiero den sektor di kuido médiko. Despues numa por disidí riba kompensashon di remedi karu pa enfermedat straño, asina e organisashonnan ta bisa. Nan ta prekupá ku e rekomendashon dje kolegio pa seguro médiko pa para kompensashon di tipo di remedi asina. E organisashonnan ta mustra rib'e echo ku te ku poko ten pasá ainda Schippers tabata satisfecho ku e kompensashon di remedi karu. El a bisa tambe ku tur pashènt tin derechi rib'e mesun kuido.

Mareshosei ta vigilá frontera ku kámara
Awe Koninklijke Marechaussee ta start ku vigilansha di kámara na 15 puesto fronteriso na Hulanda. Despues djun eksperimento ta instalá nan definitivamente awor. E idea ta pa uza kámara pa kombatí kriminalidat. Nan lo vigilá tantu e tráfiko ku ta drenta komo esun ku ta sali Hulanda. Minister Leers ta bisa ku en prinsipio lo no retené plachi di number di outo den kòmpiuter. Den Tratado di Schengen tin pará ku no ta pèrmití vigilansha permanente na frontera. Esaki ta nifiká pues ku no tin mag di uza e sistema di kámara kontinuamente.

Apelashon liberashon èks kasá di Dutroux
Ministerio Públiko di Bélgika lo apelá liberashon di Michelle Martin, èks esposa di Marc Dutroux. Dje forma akí Martin ta keda por lo menos 30 dia mas será. Ayera tribunal di Bergen na Walonia a disidí pa adelantá libertat di Martin, a kondishon di ingreso n'un konbento. Mayornan dje víktimanan di Marc Dutroux ta hostiná ku ta laga Michelle Martin sali for di prizòn promé ku tempu.

Koriente a bin bèk atrobe na India
India tin koriente atrobe, segun e kompania estatal ku ta suministrá elektrisidat. Mardugá a drecha e tres retnan di koriente atrobe den nòrt, nortost i ost dje pais. Na hopi siudat, entre otro na kapital Delhi, e fayo di koriente a paralisá bida públiko. Komo 600 mion di hende no tabatin koriente.

Airbus 380 a aterisá na Schiphol
E avion di pasahero mas grandi na mundu, o sea Airbus 380, a aterisá na Schiphol. For djawe a nave ta bula diariamente entre Dubai i Hulanda. Último lunanan mester a adaptá Schiphol pa por risibí e avion gigantesko. Mester a fortifiká outopista A4 riba Schipholtunnel, esta kaminda e avionnan ta taksi, ku 25 sèntimeter di betòn spesial.

Gore Vidal a bai sosegá na edat di 86
Eskritor merikanu Gore Vidal a fayesé na edat di 86 aña. Vidal tabata skibi novela i obranan di teater. Tambe guion sinematográfiko i televisivo i tambe ensayo. Na 1948 Vidal su novela yamá 'The City and the Pillar' a lanta konmoshon, ya ku e tabata skibi abiertamente tokante homoseksualidat i libertinahe, o sea sèks liber. Vidal mes tabata biseksual. E añanan siguiente tabata konsider'é komo luchadó pa derechi igual pa homonan.

Pabien di Obama pa landadó rèkert Phelps
Presidente Obama a duna landadó merikanu Michael Phelps pabien ku su rèkert di medaya olímpiko. Ayeranochi Phelps a gana su di 18 i di 19 medaya na Weganan Olímpiko; el a gana oro ku e tim di èstafèt di landamentu liber p'e kategoria di 4 x 200 meter anto plata pa 200 meter di natashon estilo barbulètè. E rèkert olímpiko anterior tabata di Larisa Latinina, un gimnasta ruso. Entre 1956 i 1964 Latinina a konkistá 18 medaya olímpiko.

Futbolista estelar Kluivert asistente Van Gaal
Patrick Kluivert lo bira asistente di treiner hefe Louis van Gaal. E hungadó di bala destaká di 36 aña di edat bibá na Amsterdam ke kombiná su trabou nobo ku su djòp komo entrenadó dje sekshon hubenil di FC Twente. Pa Kluivert ta un onor ku Van Gaal a pidi'é bira su asistente. Kluivert ta e futbolista ku e mayor kantidat di gol den istoria di selekshon oraño. El a hinka un total di 40 gol.

Wer na Hulanda
Solo ta bria hopi awé. Den kurso di dia awa ta kuminsá kai pisá atrobe, kuminsando den zùit. Lokalmente tin tempestat i hopi awaseru. Temperatura ta 24 te 29 grado. Mañan ta variablemente nublá, debésenkuando awa ta kai. Temperatura ta baha bira 22 grado.