Rozier ke gabinete di eksperto òf elekshon nobo

“Te ku aworaki ami komo presidente di MFK i alabes vise-presidente di Parlamentu no a haña ningun notifikashon di Dean Rozier ku e ta retirá su sosten for di gabinete Schotte”. Asina presidente di MFK, Amerigo Thodé, a duna di konosé awe mainta.
Segun Thodé e karta ku Rozier a dirigi ayera na MFK ningun ora so ta papia di kita sostén for di koalishon i mas bien ta informá partido di su pensamentu kon pa sigui kana. Den su karta Rozier ta bisa ku e no tin konfiansa mas den e aktual gobièrnu i ta proponé pa gabinete Schotte hala un banda i instalá un kabinete di eksperto ku lo mester dirigi país pa un periodo di 12 te ku 18 luna.
Reunion di Konseho di partido
Mirando e kontenido di e karta di Rozier i e urgensia pa bini klaridat den seno di partido, direktiva di MFK a disidi pa adelantá e reunion di konseho di partido pa trata e karta di Rozier. Thodé no por a bisa ku eksaktitut ki dia e reunion ta tuma lugá pero a bisa si ku esaki lo tuma lugá e siman aki mes. Den e reunion aki Rozier lo mester duna un splikashon na miembronan di MFK tokante e kontenido di su karta i e konsekuensianan di su desishon.
Reunion ku Schotte
Den oranan di awe mainta Dean Rozier a bai papia ku lider di MFK Gerrit Schotte pa duna un splikashon di e posishon ku el a tuma. Na salida di e enkuentro Rozier a deklará na prensa ku Schotte no a logra konvensé pa e kambia di opinion i ta mantené su posishon manera tin poné den su karta di ayera. Durante di e enkuentro Rozier a indiká na Schotte ku e úniko alternativa ku a sobra Schotte ta pa entregá retiru di su gabinete na gobernadór ì konvoká elekshonnan nobo òf forma un gabinete di ekspertonan.
Retiro di sostén
Riba e pregunta ku si parlamentario Rozier ta konsiderando pa retirá su sosten for di e aktual gabinete i bai ku su asiento el a duna di konosé ku esaki ta dependé si ta bini ku un gabinete di eksperto si òf no. “Lo mi no sostené ku mi asiento ningun gobièrnu ku no ta un gabinete di eksperto”.