Traha plan pa gabinete di transishon

E dos disidentenan di gabinete Schotte, Dean Rozier (MFK) i Eugene Cleopa (MAN), tur dos ta hopi aktivo trahando plan pa forma un gabinete di transishon te na elekshon nobo.
Cleopa ta negoshando ku e partidonan PNP, FOL, i PAR pa forma un gabinete di transishon. E partidonan a skibi un deklarashon di boluntat kaba. A ofresé gobernador esaki djabièrnè meinta.
Rozier no a firma e deklarashon di boluntat di Cleopa. E ta skohe pa warda e reunion di Staten di djaluna 6 di ougùstùs. Kontrali na e partidonan di oposishon i Cleopa, ainda Rozier ta tene porta habrí pa MFK pa nan koperá na un gabinete di transishon.
‘Koalishon mester keda afó”
Ora djaweps anochi Rozier a laga sa ku e ta keda na su punto di bista di bai ku su asiento, Schotte definitivamente a pèrdè su mayoria den gabinete. Mes ora Schotte a indiká ku e ke tene elekshon dia 19 di òktober. Entretantu un gabinete demishonario lo a keda.
“No ta étiko”, Cleopa ta haña, “si bo no tin sosten mas di mayoria bo no por disidí sin konsultá Staten ku bo ta bai tene elekshon.” E miembro di Staten independiente no sa ainda ta kiko lo bira e siguiente pasonan den e proseso di forma un gabinete di transishon. “Pa awe nos no a planeá reunion ainda pero ta posibel ku mi ta haña telefon aworó. Di tur manera mester inkapasitá e gobièrnu saliente mes ora.”
Lider di PAR Emily de Jongh-Elhage ta kompartí opinion di Cleopa. “Komo promé minister semper Schotte a kere ku e por disidí tur kos pa pueblo i te ainda e ta hasi esaki. Ma no tin sentido mas pasobra el a pèrdè sosten di mayoria den Staten.”
‘Mester di trankilidat’
Rozier ta basa su eskoho pa un gabinete di transishon riba otro argumento. Segun e miembro di MFK un gabinete demishonario no ta e solushon: meskos ku promé ku kaida di gabinete lo keda un kontroversa. “Pueblo di Kòrsou ke trankilidat. Nos ta dos aña mas leu i ta polarisashon so tabatin”, Rozier ta bisa.
Den un karta na tur frakshon di Staten e ta pidi sosten pa forma un gabinete di transishon pa e temporada te na elekshon. “E tarea di e gobièrnu di transishon ta pa durante un temporada spesífiko a base di un lista di prioridat, solushoná e problemanan di mas urgente di e pais. Mester pone énfasis riba finansa públiko, hustisia i enseñansa.”
Tur opshon ta habrí
Anteriormente Rozier a menta un gabinete di transishon ora ku el a retirá su konfiansa den koalishon. Awor e ta limitá su mes na un gabinete di eksperto. Kon eksaktamente e ta mira esaki no ta kla ainda.
Pa De Jongh-Elhage e asuntu ta mas kla: “Tin hende ta papia di un gabinete di transishon, un gabinete di eksperto òf un gabinete interino. Úniko kos ku mi ke bisa ta ku nos a firma e deklarashon di boluntat i ku awor nos ta warda pa tende kiko gobernador ta bisa. Si e duna nos lus bèrdè nos ta bai sinta na mesa i pensa un solushon. Nos komo PAR di tur manera ta habrí pa tur opshon.”