Boletin di djaluna 6 di ougùstùs

Un tiroteo ku a tuma luga den un tèmpel di sikh na e estado merikano Milwaukee, a kousa morto shete di persona, bou di kual e malechor mes. E hòmber a tira seis bishitante di e tèmpel mata promé ku polis a tira e mes mata. Tres persona, bou di kual un polis a haña leshon hopi serio i mester a hòspitalizá nan. Na momentu di e tiroteo tabatin prinsipalmente hende muhé i mucha den e edifisio. Ahinda no ta konosi ku ki motibu e malechor a tira e víktimanan mata. Den un bario pafó di Milwaukee polis a listra den un kas ku posiblemente ta di e hòmber ku a tira. Polis a haña asistensha di FBI i e servisio di likidashon di eksplosivo. Un bosero di e komunidat di sikh ta bisa ku kreyentenan ta haña nan mas i mas konfrontá ku violensha, pasó hende ta kere ku nan ta Taliban. Sikhnan ta hende ku ta kere den un goeroe indio di siglo 15. E goeroe aki kera uni islam i hinduismo.

Hefe di gobièrnu di Siria a haña su retiru
Promé minister sirio Hijab a haña su retiru. Asina planta di televishon di estado a informá. No ta kla kiko ta e motibu di su retiru. Tin informashon no konfirmá ku el a hui. Segun un funshonario di gobièrnu di Hordania e ta na Hordania. Hijab tabata algun luna so promé minister di Siria. El a asunmí e enkargo na yüni despues di elekshonnan parlamentario ku a tuma luga na mei. Segun oposishon e elekshonnan ei tabata ko'i spetakel.
Atrobe atentado riba Krus Kora na Misrata
Na Misrata, suidat di Libia deskonosinan a tira riba un ofisina di Krus Kòrá ku arma pisa. Na momentu ku e tiroteo a tuma luga tabatin shete trahadó den e edifisio, pero niun hende no a haña leshon. E edifisio si a haña hopi daño. Esnan ku a hasi e atake a huza granat di rakèt i otro arma pisa. Te na leu ku ta konosi, no a detené niun hende ahinda. Hefe di Krus Kòrá ta bisa ku e atake ta un kos horibel. Segun e ta di sinku be den menos ku tres luna ku deskonosinan ta ataka un ofisina di Krus Kòrá na Libia. Krus Kòrá a sera su sede na Misrata pa un tempu indefiní i a trasladá e shete trahadónan pa Tripoli.

Atake kontra agensha di prensa
Hèkernan a ataká agensha di prensa Reuters den dianan k'a pasa. Djabièrnè nan a ataká un sait di e agensa di prensa. Hèkernan a publiká entre otro un entrevista inbentá, ku Riad al-Assad, lider di e ehersito liber di Siria. Ayera deskonosinan a tuma un di e akountnan di Twitter di Reuters over. Via di e akount a publiká 22 mensahe. E mensahenan tabata prinsipalmente tokante e guera na Siria i e rebeldenan ku ta pèrdiendo tereno na Siria. Reuters no sa ken e hèkernan ta i ta investigando e kaso. Entretantu nan a sera tantu e sait komo e akount di Twitter.

Resultado ta PostNL ta bai atras
E resultadonan di e kompania di pòst PostNl den e di dos kwartal ku ta tras di lomba, no tabata masha ko'i gaba. E volúmen di benta a baha un tiki te mas o menos un kuart miar di euro. E ganashi tambe tabata mas abou kompará ku e mesun periodo aña pasa, 46 mion. Algun tempu kaba PostNl tin problema ku e kantidat di karta i pakete ku ta bahando a konsekuensha di konkurensha di koreo elektróniko i ínternèt. Pero plannan di reorganisashon ku no a duna e resultado deseá i problemanan finansiero tambe tin influensha riba e resultadonan.

Mas keho di deskriminashon
Organisashonnan anti deskriminashon a risibi aña pasa mas ku sinku pprshento mas tantu keho. Nan a registrá 6400, mas ku tresshen mas tantu ku 2010. Ta e di kuater aña konsekutivo ku e kantidat di keho a subi. Ta trata prinsipalmente di keho di deskriminashon a base di rasa. Segun e organisashonnan e jkantidat di keho relashoná ku sekso o religion enkambio si a bira menos.

Weganan Olímpiko
Na Weganan Olímpiko zèildo Marit Bouwmeester a gana medaya di plata i sprenter Robert Lathouwers a kualifiká pa e kareda semi final riba 800 meter. Pa e tirado di déskùs Rutger Smith Weganan Olímpiko a resulta un desepshon total. E no a logra kualifiká pa e final. Erik Cadee si a logra esaki. E final di tirmanetu di déskùs ta mayan. Atleta Usain Bolt a prolongá su título olímpiko. Na Londres e hamaikino a gana e título riba 100 meter atrobe riba un manera aplastante den 9.63 sekonde. Churandy Martina kende a kore pa Hulanda a kualifiká su mes sorprendentemente pa e kareda final riba 100 meter. El sali number seis ku un tempu di 9.94. Mayan Churandy ta kore e kareda di 200 meter, su spesialisashon.

Ikono di muzik ranchero a fayesé
E kantante méhikano Chavela Vargas a fayesé na edat di 93 aña. E tabata un ikono di músika latinoamerikano. Ademas e tabata e símbolo di derechinan igual pa homoseksualnan. Mas ku mitar siglo pasa, tempu ku e tópiko aki tabata tabu ahinda den e parti aki di mundu el a revelá ku e ta homoseksual. Vargas ta konosi pa su kantikanan manera 'Volver' i 'En el último trago'. Tabata konsidera Vargas e kantante ku a modernisá muzik ranchero. E musika popular di Méhiko.

Pronóstiko di tempu na Hulanda:
Awe mainta áwaseru a kai prinsipalmente den e parti nortwèst di pais. Awetardi tin chèns riba mal wer ront Hulanda. E temperatura ta subi te ku 21 grado. Mayan tin algun yobida promé. Despues ta bira seku i solo ta sali i e temperatura lo ta 20 grado.