Resúmen di korant hulandes di 7 di ougùstùs

Volkan Mount Tongariro, ku ta keda na Nueva Zelandia, ta den erupshon. E volkan no tabata aktivo último 100 aña. Un testigu ta bisa ku awor tin un buraku nobo den e seru. E wèpsait di New Zeeland Herald a pùblika esei. Mount Tongariro ta keda mei mei di e isla. E sitio ta hopi popular serka turistanan. Tambe a uza e sitio ei pa graba e pelíkula 'Lord of the Rings'.
Hóbennan na Hulanda ku tin nan diploma di mbo, no por haña trabou, asina ta pará den De Volkskrant. Skolnan di ofishi ta siña hóbennan ofishi ku nan no por haña trabou kune. Desenas di studiante a haña nan diploma pero no tin pedida di e fishinan ei riba merkado laboral. Ta trata di entre otro: trahadó den ict, trahadó pedagógiko, trahadó di krèsh.
Kwakoe ta keda pasa den tempunan difisil. De Telegraaf ta papia di un 'kaos den festival Kwakoe'. E organisashon a hañ'e ta para e torneo di futbòl pa motibu di problemanan finansiero. Ta di lamentá pasombra ta esei ta e esensia di Kwakoe. Fuera di esei a kore ku mal pagadó di stènt i bishitantenan no sa unda ta tene e festival.
'Mi yu muhé a bisa: mama, bo a hasi kos di mala mucha?', ta titular den De Volkskrant. E matutino tabata presente na kurso pa reeduká mamanan ku tabata den prizòn. Tin hopi chèns ku nan yunan ta kai será den futuro. Pero esaki ta bira menos na momentu ku e mamanan sá kon pa eduká nan yunan. E korant a sigui dos mama ku ta bini for di Karibe. Nan ta siña kon nan tin ku eduká nan yunan. I ku èksito: "Awor mi por keda rustig ora mi yu hòmber tentá mi", asina mama Naomi a bisa. E kurso 'Betere Start', esta 'Bon komienso', ta asina èksitoso ku awor ministerio ke pa tur mama ku ta den detenshon haña e kurso.
Kantornan kontra deskriminashon, aña pasá a haña mas keho ku e aña anterior. E kehonan a subi ku 5 porshento. Asina ta pará den Trouw. A drenta mas ku 6400 keho, ta trata di mas ku 300 keho mas ku na 2010. E kantidat di keho ta keda subi último 4 aña. Prinsipalmente e kantidat di keho di deskriminashon pa motibu di rasa a subi.
AD ta notifiká ku Arjen Erkel, kandidato riba lista di CDA, ta riba lista pa atrae votadónan na Boneiru, Sint-Eustatius i Saba. Ta promé biaha ku habitantenan di e islanan BES tin mag di vota durante elekshon di parlamentu ku ta tuma lugá riba 12 sèptèmber na Hulanda. Erkel ke pa e islanan sera konosí kune.
VVD no ta manda niun miembro bishitá e islanan, esta segun parlamentario André Bosman. E partido ta bai uza emisoranan di radio i korantnan pa hiba kampaña. Pero no sa ahinda den kua idioma ta bai hasi esei: "Hulandes no ta usual pa Saba", segun Bosman. PvdA tambe ta manda flyer i poster pero tambe blasnan pa e islanan hulandes karibense. SP no ta bai hasi ningun esfuerso, pasombra asina Ronald van Raak ta bisa: "Ta straño ku awor diripiente e partidonan tin atenshon pa e islanan." Asina por lesa den AD.
Esnan ku a kere ku ganamentu di medaya di plata tabata e punto kulminante pa e koredónan di kabai ayera ta kibuká. E hinetenan a para na e tribuna kaminda prínsipe Alexander i prinsesa Máxima tabata pará huntu ku nan yunana i a duna nan honor. Nan kuater a para riba un rei i a kita sombre pa su altesa i su famia. "Tabata e momentu mas espektakular di e dia, esta pa mi", asina hinete Jur Vrieling a komentá despues di a gana medaya durante Weganan Olímpiko. Despues di esei prens Willem-Alexander a duna e koredónan di kabai un pintura. Esta pa medio di reporteronan. Ta trata di un pintura ku Amalia a a pinta pa nan riba tribuna. Riba e pintura por mira un hinete riba kabai bisti na oraña i un kopa ku number 1 skibi riba dje. E rubrika di AD esta Sportwereld a públika un potrèt di e pintura.