Wiels: PS ta tuma responsabilidat polítiko

For di un sondeo di opinion ku a tene na enkargo di Wereldomroep bou di 408 votadó kurasoleño a bin sali ku Pueblo Soberano, e partido di Helmin Wiels, atrobe lo haña 19 porshento di voto, meskos ku na elekshon di 2010. Tambe votadónan atrobe ta duna preferensha na e koalishon eksistente di MFK, PS i MAN. Kon Wiels ta pensa riba e resultadonan aki i kiko ta strategia di Pueblo Soberano pa elekshon binidero na òktober?
“Mi no tin opinion tokante e resultadonan di e sondeo aki. Den kurso di añanan a tene diferente sondeo pero PS semper a sker e resultadonan tir’afó. E enkuesta bèrdadero ta dia 19 di òktober 2012.” Ta aparente ku Wiels no tin niun tiki kunés ku segun e sondeo di opinion atrobe Pueblo Soberano a haña 19% di votonan i ku esaki e lo ta e di tres partido di mas grandi.
E ta mas interesá den e ‘votadó ku ta zuef’: e grupo ku den e sondeo ku no a ekspresá preferensha pa un partido i ku ta kasi mitar di tur votadó. “Naturalmente bo ke alkansá nan. Nos metanan a keda meskos pa e elekshon binidero i esei ta un bentaha. Ademas nan ta simpel, kalidat mas haltu di enseñansa, oportunidat honesto pa trabou i transparensha den NV di gobièrnu. Mi no ta prekupá pa e grupo di votadó aki.”
Gai rápido
Tòg Wiels no ta masha kontentu ku di repente tin elekshon aki algu mas ku dos luna kaba. “Nos no a ferwagt esaki. Nos kalkulashon tabata pa mas trempan otro aña. Ma mi ta un gai rápido. Nos lo logra sigur pa saka nos strategia na tempu.”
[related-articles]Kiko e strategia aki ta enserá e lider di PS no ke bisa. E ta papia solamente di su programa di radio, e enkuentronan di tur djasabra i e bishitanan na bario kaminda e ta trata di amplia e proseso di konsientisashon di votadó. E no ta konfirmá ku e ta ko-responsabel pa e malkontentu ku gobièrnu Schotte i e sifra di 5.3 ku e enkuestadonan a duna koalishon. “PS semper a produsí segun su bon konsenshi i a hasi hopi. Si tin kos ku no ta bai bon mi ta kambia nan mes ora. Mi no ta warda te na final, mi ta pone minister ku no hasi nan trabou bon baha. Responsabilidat polítiko, ta di esei ta trata."
Solushon pa e problema di muhé
Ta resultá ku Pueblo Soberano ta espesialmente un partido atraktivo pa hende hòmber (tres kuart di votadó di PS) ku en general tin un edukashon sekundario mínimo. “Esei naturalmente ta lástima. Ta p’esei lo mi pèrkurá di lusi èkstra bon e tempu binidero”, e ta chansa. Komo solushon serio e ta mira ‘muhé riba lista’, meskos ku na 2010. Kiko mas e por hasi pa apelá na e votadó femenino e lider di PS no sa ainda.
T’asina si ku último dianan e tabata trahando riba un lema nobo. “Pero kiko e ta, esei mi ta bisa mas lat den e siman aki”, Wiels ta bisa. “E faktor di sorpresa ta masha importante pa Pueblo Soberano.”
Lesa aki e resultado di e sondeo