Parada: Tin duda kiko ta vota den elekshon binidero

Hopi votadó na Kòrsou ainda no sa kiko nan ta bai vota. Mitar di e elektorado ta ‘zuef’. Esaki a sali for di un sondeo di opinion ku Wereldomroep a laga hasi. Asta si nos puntra kalke hende riba kaya, e no por bisa riba kua partido e lo bai vota, pero e ta kontentu si ku ta tene elekshon nobo. Nos Parada ta den kuadro di elekshon binidero na Kòrsou.
E partido MFK di promé minister Schotte ainda tin preferensha, ounke tin dissatisfakshon ku su gabinete. Tòg hopi hende no ke pa PAR bini den gobièrnu atrobe. Pero e malkontentu ku e aktual gobièrnu Schotte ta mas prominente.
Partido nobo
Den e skina di kòfi di supermerkado Centrum Mahaai dos hòmber mas haltu di edat ta kombersá tokante polítika aktual. “Si, bèrdat. Ainda mi ta ‘zuef’. Tin asina tantu kos urgente ku mester trata ainda. Pakiko saka tantu plaka pa elekshon nobo? Kòrsou ta bankrut. Di bèrdè mes mi no sa si mi ta bai vota.” Su kompañero di kòfi ta bisa ku konvikshon ku e sí ta bai usa su voto. “Ami sí gusta kambio. Si bini un partido nobo e ta haña mi voto. Mi konosé e partidonan bieu kaba, nan no ta sirbi.”
Un señora den e departamentu di pan ta haña ku votadó mester buska bon informashon tokante loke e partidonan tin di ofresé Kòrsou. Mester skohe numa pa e koalishon aktual pasobra no ke e partidonan bieu den gobièrnu? “Ta ken ta partido bieu? E partidonan MFK, MAN i PuebloSoberano tambe ta bieu awó. Ke men bon mira nos mester vota pa un partido henteramente nobo.”
Sin trabou
Den seno di Otrobanda, den Breedestraat, tambe e opinionnan ta varia. Segun e sondeo di opinion di Wereldomroep, hopi votadó ta duda i no sa riba kua partido nan lo bai vota. Un dama hóben no sa ainda, ma e ta kere ku tòg e ta bai tira su voto riba un partido di koalishon. Pakiko: “Pasobra nan a hasi hopi pa pueblo di Kòrsou. PAR nò.” Un otro señora ku ta hasiendo kompra tampoko no ta duna PAR lus bèrdè. PAR no ta haña mi voto. M’a keda sin trabou ku PAR den gobièrnu. Koalishon mester haña un chèns atrobe.”
Un señora mas di edat ta kontradesí ku e koalishon di MFK lo a hasi bon trabou: “Ami ta bai vota sigur, pero no pa e koalishon aktual. Nan mester bai kas. Ta tur dia tin un otro problema. Nos mester haña un bon gobièrnu.”