Resúmen di korant 8 di ougùstùs 2012

Oro istóriko.... Superoro....Buelo di Oro. Esakinan ta djis algun titular riba portada di Algemeen Dagblad, De Telegraaf i De Volkskrant. Titularnan ku dimes ta ilustrá logro deportivo istóriko di Epke Zonderland. Ayera el a gana e promé medaya di oro pa Hulanda ku gimnasia na Weganan Olímpiko di Londen. Último biá ku esei a sosodé tabata ochenta aña pasá.

Minister presidènt Mark Rutte tabata un dje proménan ku a duna Epke pabien. Tres kuart'i ora despues dje homenahe e promé minister tabata na liña kaba. "E tabata mió na altura ku mi mes", asina Zonderland a bisa den chansa. Den deklarashon pa Algemeen Dagblad, Epke a bisa tambe ku Rutte tabata sa ku te awó e gimnasta destaká nunka a yeg'i skor mas ku 16.400 i ku esei ta eksaktamente esun di Fabian Hambüchen. Ni ami n'ta sa e ko'i", segun Zonderland.

Klupnan di promé divishon hulandes a sera e dil televisivo mas grandi den istoria di futbòl, asina De Telegraaf ta informá. A bende derechi di transmishon ku Fox di Merka pa mas ku un miar di euro, esaki pa un periodo di 12 aña entrante temporada futbolístiko di 2013 pa 2014. Prinsipio dje aña akí e ret televisivo, propiedat di magnate di media Rupert Murdoch, a kumpra e derechinan di Bundesliga aleman bou dje nòmber Sky.

E siman akí a ser'e dil na Londen. Den sekreto apsoluto a presentá e dil ei na direktiva di tur klup futbolístiko di promé divishon. E kompania di Murdoch ta bai paga un promedio di 80 mion di euro pa aña p'e derechinan di transmishon di weg'i bala. Fox lo tuma e debe di 60 mion di euro di Eredivisie Live na su enkargo, asina ta pará den De Telegraaf. No ta kla ainda ki konsekuensha e dil lo tin p'e resúmennan di deporte di notisiero hulandes NOS.

Munisipionan tin ku subi lista di espera pa homenahiá landadó estelar Ranomi Kromowidjojo i e demas ganadónan di medaya, di akuèrdo ku Nederlands Dagblad. Sauwerd, lugá di nasementu di Kromowidjojo na Groningen, mester warda te djabièrnè 17 di ougùstùs. Lareina i gabinete na Den Haag tin preferensha, meskos ku Eindhoven, kaminda e landadó kampion ta biba i train awendia.

Protokòl olímpiko ta dikta sekuensha di aktividat rigurosamente pa ganadónan di medaya. "Asina ta ku nos no ta desviá djesei", asina Koninklijke Zwembond a deklará pa Nederlands Dagblad. Djaluna awó mayoria deportista olímpiko ta yega ku trèin na Den Bosch, kaminda ta tene e promé homenahe. E dia siguiente ta spera nan den Ridderzaal na Den Haag anto despues nan lo akudí serka reina Beatrix.

Hulandesnan no ta tuma kriminalidat mas. Ta p'esei nan ta pasa informashon di delitu na mayor eskala, asina ta pará den De Telegraaf. Den e promé mitar dje aña akí Meld Misdaad Anoniem a registrá un kantidat rèkert di 7400 notifikashon di krimen, loke ta nifiká un oumento di 20 porshento kompará ku aña pasá, o sea 2011. Kasonan grave manera asesinato, abuzu di mucha i narkotráfiko ta esnan ku mas sa tep anónimamente n'e liña di telefòn na Hulanda. Pa dia ta drenta un promedio di 40 tep.

E kantidat di atrako na hoyeria a baha espektakularmente fo'i prinsipio dje aña akí. Loke ta remarkabel, segun Trouw. Esaki siendo ku for di 2008 hoyeronan tabata netamente e komersiantenan ku mas i mas tabata kai víktima di robo i violensha. Ron Looije di Hunta di Hefe di Kuerponan Polisial a bisa Trouw ku polis ta gara mas i mas ladron den akshon. Ademas djesei polis ta logra evitá atrako mas lihé ku promé nan ayá.

Ofisinana di VVV ta birando mas i mas skars na siudat chikí i pueblesitu na Hulanda. De Volkskrant ta informá ku e aña akí a sera 28 sukursal di e organisashon di turista, ku ta eksistí 125 aña kaba. A troka e VVV nan den sentro dje pueblesitunan ku bali di informashon den tienda, museo i biblioteka. Medidanan di ouseridat di munisipionan ta kousa prinsipal di siere di hopi ofisina di VVV, komo ku nan ta dependé pa gran parti di supsidio.

Kambio di kondukta i kustumber dje konsumidó tambe ta hung'un ròl. Turistanan ta orientá nan mes mas i mas riba énternèt. E kantidat di bishitante di wèpsait di VVV a subi enormemente, asina ta pará den De Volkskrant.