Habitante di edat avansá na Boneiru a fayesé

KRALENDIJK – Na edat respetá di 101 aña, kasi pa yega 102, Mercelina Ilario a fayesé e siman aki.
Merce òf Mama, manera tabata yam’é, tabata un konosido haladó. E tabata biba na Tera Kòrá, pero a pasa e último añanan di su bida na Kas di Kuido di Fundashon Mariadal.
For di tempu ku e tabata hóben Mama a kuminsá ta hala hende enfermo. El a siña esaki serka su mama, Virginia Mariana, ku tambe tabata un kurandero òf haladó. Su spesialidat tabata pa trata muchanan ku spanta, hòmbernan ku padrehon i muhénan ku madre, un aparente formashon di gas den barika. “Mama tabatin un don. Te ora ainda ku el a bai Kas di Kuido hendenan a sigui bishit’é pa tratamentu. Na sierto momentu mi mester a pidi hendenan pa medio di publikashon den korant pa no konsult’é mas. Asina el a bin stòp di praktiká”, su yu muhé Ena Ilario a konta Extra.
Semper Mama tabata kla pa yuda tur hende. E tabata hasi uso di huma di sigaria durante pa su tratamentunan. Ku su zetanan spesial e tabata hala su pashèntnan, for di mucha te hende grandi. E tabatin tambe su altá ku santu, pasobra e sa bisa ku ta Dios ta kura e hendenan. Hopi bia den mardugá grandi, ora ku hendenan no por a wanta doló mas, nan tabata akudí na kas di Mama den Tera Kòrá pa yudansa. E tabata hasi esaki ku amor, sin kik, sin kore ku e hendenan for di su kas. Su mannan tabatin
algu mágiko kuné.
Pashèntnan for di Kòrsou i Aruba
No solamente hendenan di Boneiru sa konsultá Mama Ilario. Asta for de Kòrsou i Aruba, na unda nan tabata sa di su eksistensia, pashèntenan sa bini. Mama no tabata gusta papia tokante su práktika komo haladó. Un di e tiki eksepshonnan ku el a hasi tabata pa e ekipo ku ta produsí ‘Herensia’. A usa esaki pa e dokumental pa televishon titulá ‘Di Mundu Nobo pa Tera Kòrá’, den kua por mira Mama tratando un mucha hòmber.
Haladó
E profeshon di haladó tabata hopi konosí na Boneiru te masoménos 50 aña pasá ainda, momentu ku e segundo dòkter a establesé riba e isla aki. Tabatin dos tipo di haladó, esta e haladó ku tabata trata malesanan síkiko i un tiki físiko, miéntras ku tabatin e haladó ku bo por a konsiderá komo un fisioterapista, ku tabata trata un múskulo, un brasa of pia ku sali for di lugá. Mama tabata trata e hendenan mas tantu ku problema síkiko, un mucha ku a spanta, hende grandi ku padrehon (doló den barika), tambe hendenan ku tabatin tristesa i tabata depresivo.
Mercelina Ilario a nase dia 22 di ougùstùs 1910. No tabata falta mashá pa el a alkansá 102 aña ei edat. Pa hopi tempu e tabata e habitante mas bieu di Boneiru. Pas na su restunan, kondolensia na su famianan.