Sneekweek’ na Friesland, ‘Snèkweek’na Kòrsou

Mientras ku na Friesland, Hulanda, ‘Sneekweek' (siman di Sneek) t’aden, na Kòrsou te ku djaweps 9 di ougùstùs ta selebrá ‘Snèkweek’, siman di snèk. Tur dia ta bai dal beter na un otro snèk riba e isla despues di trabou.
“Má yega di pasa na Sneekweek na Hulanda i mi tin antepasado di Friesland pero e inisiativa aki no ta relashoná ku esaki. Ta puramente un wega di palabra ku hopi hende a kuminsá usa.”Organisadó Nanne Holtrop (32) ta sorpresá di e popularidat ku su ‘Snèkweek’ a haña último dianan. Via un página di Facebook el a invitá algun amigu pa e evento lúdiko aki. Esaki tabatin komo resultado ku djabièrnè pasá un grupo di mas ku setenta hende a bini huntu na e snèk na haf di piskadó na Caracasbaai.
Snèk and the City
Último tres dia a bishita diferente snek. “Djasabra nos tabata na Netto Bar, djadumingu na Radiosnack i ayera na Kabuyasnèk. Awe nochi Nojosnèk banda di planta di awa ta riba programa i mayan bou di e nòmber ‘Snèk in the City’nos lo tene un ladiesnight speshal na e snèk banda di barberia Strak Strak na Waaigat.”
No típikamente ‘lugá di makamba’
Robert Bos (28) lo ta presente tur dos anochi. Te ainda e no a pèrdè niun snèk. “E siman aki ta un ampliashon di mi rutina nòrmal. Ta algu otro atrobe.”
Marloes Kempes tampoko no ta falta niun anochi. Ta su intenshon pa kore henter e siman di snèk. Segun e, e evento ta e ehèmpel perfekto di e fasilidat ku ta aseptá un inisiativa asina na Kòrsou. “Mi ta haña ta típiko pa Kòrsou ku e idea di un persona ta haña tantu akohida i ku tin tantu hende ta partisipá .”
Pa alkansá mas tantu partisipante posibel ta bishita hopi lugá diferente. Parsialmente ta skohe e snèknan di antemano via un sondeo riba Facebook i ta disidí mas aleu a base di sugerensha di e partsipantenan. “E úniko eksigensha ta un ‘públiko amplio’. Nos no ta bai e luganan ‘tipikamente pa makamba’.
Lo keda ripití tur aña
Nanne tin intenshon pa bolbe organisá ‘Snèkweek’otro aña i e ora ei usa karchi di stèmpel, meskos ku na e otro tradishon di Friesland, Elfstedentocht, un kareda di sgats riba eis natural ku ta pasa diesun siudat na Friesland, i ku na final lo trese un medaya speshal pa e partisipantenan. “Pero mas ku un edishon pa aña lo no tin”, Nanne ta hari. “Pasobra ta basta pisa pa pasa dal serbes tur anochi.