Bon Informá: ‘No tin sufisiente atenshon pa héroe Tula’

Segun Plataforma Sklabitut i Herensia di Sklabitut kontrali na añanan anterior e aña aki e konmemorashon di ‘Dia di Lucha pa Libertat’ lo tin un karakter sobrio. Motibu di esaki ta ku gobièrnu di Kòrsou no a pone fondonan disponibel pa konmemorá e fecha aki.
Konsekuensia di esaki ta ku lo konmemorá e fecha di awe na un manera simpel pero sin afektá e kontenido i nifikashon di e lucha di Tula. Asina Frank Kiridongo presidente di e plataforma a duna di konosé den e edishon di Bon Informá di e siman aki den kual nos a papia tambe ku historiadó Jean Henriquez riba e konmemorashon di 'Dia di Lucha pa Libertat'.
No tin atenshon
Ambos ta konstatá ku no tin sufisiente atenshon pa nos héroenan i fechanan históriko, ni di parti di nos gobernantenan ni di parti di pueblo en general. Segun Jean Henriquez esaki tin di haber ku nos sistema di edukashon ku a keda imponé dor di kolonialismo kaminda nos história i nos kultura no ta haña e atenshon nesesario. “Kolonialismo a hasi nos mente prisionero i nos mester dekolonisá nos mente dor di bini ku nos propio sistema di edukashon”.