Konmemorashon 'Dia pa Lucha i Libertat' ku asistensia abou

Djabièrnè 17 di ougùstùs a konmemorá e di 217 aniversario di e rebelion di katibu ku a tuma lugá na 1795 bou di liderato di Tula. E tema sentral tabata: ‘di abolishon pa emansipashon’. Sinembargo e aña aki nos por a konstatá ku e asistensia di públiko tabata muchu mas abou ku añanan anterior.
For di un prinsipio Plataforma Sklabitut i Herensia di Sklabitut a anunsiá ku e konmemorashon di e aña aki lo tin un karakter sobrio pa motibu ku gobièrnu no a pone fondonan disponibel pa finansiá e aktividat aki. Segun presidente di e plataforma, Frank Kiridongo, pa motibu di falta di sèn un gran parti di e show kultural ku normalmente sa tin mester a kai afó. Probablemente ta esaki a pone tambe ku menos hende a asisti na e akto di konmemorashon.
Sorpresa
E akto ofisial a kuminsá ku ponementu di krans na e monumentu di 'Lucha pa Libertat' dor di representante di diferente organisashon entre nan Minister Carlos Trinidad den representashon di gobièrnu di Kòrsou. Despues a sigui ku e parti di diskurso kaminda diferente orador a amplia riba e tema ku a skohe pa e aña aki. Remarkabel ta ku apesar ku e no tabata poné riba e programa e Ministernan presente Carlos Trinidad i Carlos Monk (tur dos di Pueblo Sobereno) a pidi pa hiba palabra i a dirigi nan mes na e públiko presente. Den un entrevista na Telecuraçao Frank Kiridongo a bisa ku esaki sigur a kai komo un sorpresa serka dje mirando ku no ta normal ku dos minister ta hiba palabra.
Otro kos ku a hala atenshon ta e echo ku e aktual direktor di Kas di Kultura, Gibi Basilio, no tabata presente durante di e akto di konmemorashon di 'Dia di Lucha pa Libertat'. For di un funshonario di Kas di Kultura nos a komprondé ku Sr. Basilio ta den eksterior ku vakashon i p'é motibu ey e no por tabata presente.