PAIS ke ‘Curaçao Financial Services Board’

WILLEMSTAD – PAIS, e partido polítiko di Alex Rosaria, ke un ‘Curaçao Financial Services Board’ mas lihé posibel. E servisio aki lo mester tin mesun efekto pa servisio finansiero ku Curaçao Tourist Board (CTB) tin pa turismo.
Segun PAIS e servisio finansiero por kontribuí na empleo, na kresementu ekonómiko i e por generá devisa nesesario pa drecha balans di presupuesto.
‘Curaçao Financial Services Board’ mester duna konosementu internashonal na sektor finansiero di Kòrsou, pèrkurá pa kita Kòrsou for di lista pretu tur kaminda i inisiá tratado fiskal. Ademas e servisio mester duna atenshon na legislashon lokal i pèrkurá pa Kòrsou por partisipá kompetetivamente den mundo finansiero.