Investigashon di e kurpa sin bida di Kanoa ta un misterio

WILLEMSTAD – Ni Ministerio Públiko (OM) di Kòrsou, ni Instituto Forénsiko Hulandes (NFI) no por bisa kon ta pará ku e investigashon forénsiko di e kurpa sin bida ku na luna di mart a haña na Playa Kanoa. Tur dos ta mustra riba otro pa e kontesta.
Na luna di mei a manda e kurpa sin bida ku a haña na Playa Kanoa pa NFI den un kápsula speshal, pa investigá e identidat i e kousa di morto. Pa haña sa e identidat a manda DNA di persona ku a pèrdè tambe, entre otro di Rayzienne Scoop ku a pèrdè for di yanüari.
Esun ta mustra riba otro
Kuminsamentu di yüli OM di Kòrsou a laga sa ainda ku nan ta ferwagt e resultadonan ‘den algun siman’. Awor ku basta siman a pasa di repente ta un misterio kiko e resultado di e investigashon ta i ki dia ta ferwagt di hañ’é anto. “Te ainda nos no a haña informashon nobo di NFI tokante e investigashon”, asina bosero di Ministerio Públiko Norman Serphos ta reakshoná. E bosero tin un idea sí, pakiko no tin e fluho di informashon ei, sinembargo e no por elaborá riba dje. “Kisas lo bo por akudí na polis pa mas aklarashon tokante kon ta kava di hèndel e proyekto, nos ta duna solamente informashon ku nos mes ta risibí via NFI.”
Polis ta referí bèk na Ministerio Públiko i ta desmentí ku lo tin problema den kon ta kaba di hèndel e enkargo. “Nos no ta duna enkargo pa investigashon, ta Ministerio Públiko ta hasi esei. Nos tin e enkargo solamente pa e kaba di hèndel e aspekto tèkniko.” Meskos tambe NFI ta referí na Ministerio Públiko pa loke ta trata suministro di informashon. Riba e pregunta ken eksaktamente ta esun ku a duna e enkargo, NFI ta laga sa ku 'pa siguransa' mester averiguá 24 ora despues e bosero ta konfimá ku en bèrdat ta Ministerio Públiko a deponé e enkargo serka NFI.
Mas misterio
Otro misterio ta si a kaba e investigashon kaba òf si e t’aden ainda. NFI ta laga sa ku nan no por bisa nada tokante esaki sin pèrmit di esun ku a duna e orden. “Nos no ta hasi esaki pasobra nos no ke stroba un eventual investigashon di polis ku por ta koriendo. Ta posibel ku pa motibu táktiko polis no ke duna sierto informashon ainda.”