Keho presidente direktor Banko Sentral kontra ministernan

Presidente direktor Emsley Tromp di Banko Sentral di Kòrsou i Sint Maarten (BSKS) ta bai entregá keho na Ministerio Públiko (MP) di ‘aktonan posibelmente kastigabel’. En todo kaso ta trata di ministernan George Jamaloodin (Finansas, MFK) i Abdul Nasser el Hakim (Desaroyo Ekonómiko, MFK).

“Mi a instruí mi abogado pa formulá e keho formal i entregu’ é na MP”, Tromp a bisa djárason tra’i mèrdia 25 di mei den mikrofon di Radio Direct.

‘Echonan kastigabel’
Segun Tromp ta trata di un intento pa privilegiá e kompania di seguridat Speedy Security en konekshon ku trabounan die e bankero di kas di gobièrnu di Kòrsou, Girobank. Te ku ora el a bira minister, Jamaloodin tabata manehá Speedy.

[related-articles]Hakim a eksiguí, asina Tromp ta bisa, ku Blue Bay Resort mester dun’é ‘un pida tereno’ pa nan por haña un tax holiday (un provishon pa no paga impuesto temporalmente). Tambe Hakim lo a indiká ku en konekshon ku sierto aktividat di bunkering na Bullenbaai ‘lo mester buta sèn riba su kuenta bankario’. Finalmente Tromp a deklará ku den e relashon entre promé minister Gerrit Schotte i doño di pòmp di gasolin Vanddis el a detektá ‘konflikto di interes’.

E presidente direktor di Banko Sentral a reklamá anteriormente e siman akí ku di un manera sistemátiko e gobièrnu aktual di Kòrsou ta purba hasi funshonamentu di e banko sentral imposibel. BSKS ta ‘práktikamente lam’ dor di esaki, segun Tromp.
Konferensia di prensa
En konekshon ku desaroyonan resien entre BSKS i gobièrnu di Kòrsou, promé minister Gerrit Schotte a anunsiá un konferensia di prensa relámpago pa djarason 25 di mei shet’or djanochi na Fòrti.