Choke entre Tromp i gobièrnu tabata inevitabel
For di dia ku e Gobièrnu MFK -PS - MAN a sinta na fin di aña 2010 entre Gabinete i e tòp di Banko Sentral di Kòrsou i Sint Maarten (CBCS) nan no tabata parti un pan ku otro. Tópikonan manera dolarisashon, Hunta di Komisario, harmonisá leinan di Kòrsou ku normanan internashonal i fasilidatnan di finansiamentu pa Aqualectra mas i mas por a mira kon e diferensia den vishon tabata krese.
Último simannan krítika di gobièrnu a intensifiká riba presidente -direktor Emsley Tromp. Tromp tambe a posishoná su mes último dianan mas i mas krítiko kontra gobièrnu: esaki por ehèmpel lo no tin noshon di e urgensia di e défisitnan riba balansa di pago'.
Resistensia sistemátiko Den e programa radial Pèrspektiva di djamars 24 di mei Tromp a trese e ponensia remarkabel dilanti ku Banko Sentral ta haña resistensia sistemátiko dor di gobièrnu Schotte'. Komo ehèmpel el a menshoná ku no ta kontestá e kartanan ku e manda pa minister di Finansa George Jamaloodin (MFK) i tambe ku no ta tene e enkuentro di kada dos luna entre banko i gobièrnu.
Ta bini aserka ku te ainda gobièrnu no a kaba di nombra e Konseho di Komisario (RvC). Esaki ta kondusí na otro problema. Asina ta ku presupuesto di Banko Sentral ta ainda no a haña aprobashon tampoko e kuentanan anual di 2010 no a haña aprobashon. Ta Hunta di komisario ta e órgano ku ta aprobá e dokumentunan akí.
Ademas tin aktualmente un skarsedat di sierto plaka di papel, di 10 i 25 florin. Sin aprobashon di Hunta di komisario no por drùk plaka di papel. Tambe e preparashonnan pa introdukshon di florin Karibense, ku lo mester bai remplasá e florin Antiano, ta parި ketu pasobra no tin supervisor pa duna aprobashon pa e diferente fasenan di e proseso akí.
Lista pretu
Alex Rosaria, lider di partido polítiko Pais, ta haña ku e señal di emergensia ku Tromp ta emití ta trese preokupashon. Rosaria ta baha pisá riba e hecho ku gobièrnu no ta manda e lei di detekshon spesial i pustamentu di plaka via Internet pa tratamentu na Parlamentu. Miéntras ku e leinan akí no drenta na vigor, Banko Sentral lo no por ehersé supervishon riba e terenonan akí. Di e manera akí Kòrsou lo no por kumpli ku akuerdonan internashonal den kombatimentu di labamentu di plaka i finansiamentu di korupshon.
[related-articles]Kòrsou a tuma e akuerdonan akí di Antia Hulandes i lo risibí fin di ougùstùs evaluashon tokante esaki dor di Caribbean Financial Action Task Force. Un mal evaluashon lo por kondusí ku lo pone sektor finansiero kompletu di Kòrsou riba e lista pretu. “Lo ta di lamentá mashá ku awor ku Kòrsou relashoná ku legalisashon di impuesto internashonalmente ta notá riba un lista blanku, e sektor finansiero di e pais ta ser poné riba listanan pretu”, di akuerdo ku Rosaria.Meskos tambe Curaçao International Financial Services Association (Cifa) ta teme pa e 'konsekuensianan serio pa Kòrsou' si Banko Sentral i Gobièrnu di Kòrsou no sa di haña otro pronto.
'Bèrgwensa' Eks minister Ersilia 'Zus' de Lannooy ta kompartí e preokupashonnan di tantu Rosaria komo di Cifa. “Kòrsou lo haña e aña akí dos evaluashon importante: esun di CFATF i esun di Fondo Monetario Internashonal (IMF). Si nos skor malu, esei lo ta un bèrgwensa.” De Lannooy ta pensa den esaki no solamente na e hecho ku lo keda publiká sin bo resultadonan malu stret sin skonde nada. Di òktober 2009 te ku òktober 2010 de Lannooy tabata na nòmber di Antia Hulandes presidente di CFATF. Den e kalidat ei e tabata urgi diferente pais pa nan pone i tene nan legislashon finansiero na òrdu. Lo ta amargo pa hustamente Kòrsou mes mester faya den esaki.
Invershonista CFATF ta mira si tur legislashon nesesario ta proklamá i ta ehekutá pa kombatimentu di labamentu di plaka i finansiamentu di teror. IMF ta skrudiñá maneho di pais riba tereno di finansa, ekonomia i den un grado ménos asuntunan sosial. Asina ta determiná si un pais tin un klima di invershon bon òf hustamente e no tin un bon klima di invershon.
“E resultadonan di e evaluashonnan akí ta públiko. Invershonistanan ta tuma nota di esaki. Si nos no publiká tur e leinan akí na tempu i ehekutá nan, e pais ta pèrdè su forsa di atrakshon i kredibilidat serka otro pais i serka invershonistanan.”