Deliberashon interparlamentario di Reino a kuminsá

Awe djamars 14 di yüni a inisiá e deliberashon entre parlamentunan di Hulanda, Kòrsou, Aruba i Sint Maarten den Eerste Kamer, o sea senado hulandes na Den Haag. E enkuentro a tarda pa kue spit pero despues di e diskurso di apertura di Ivar Asjes, presidente di Staten di Kòrsou i di un remarke di Eric Lucassen, parlamentario hulandes miembro di PVV tokante korupshon n'e islanan, e ambiente a lanta basta sí.

Klaas de Vries, ku ta fungi komo suppresidente di Eerste Kamer a duna e delegashonnan bonbiní. Den su diskurso di bonbiní De Vries a kòrda esnan presente ku ta pa promé biá ku parlamentunan di e paisnan nobo di Reino ta deliberá ku otro for di tempu ku e lanta konstelashon estatal nobo di Reino dia 10 di òktober 2010. De Vries a bisa di ta spera ku e reformenan estatal no solamente lo bira piesa final di un proseso di años di renobashon struktural, pero tambe inisio di un fase nobo den kua lo traha riba un mió futuro pa pueblonan di e paisnan di Reino.

Asuntunan interno
E presidente dje delegashon kurasoleño a marka pouta mésora den su diskurso di apertura, bisando ku Kòrsou ke pa atendé independientemente ku su asuntunan interno i pa trata otro komo igual. Asjes a referí na e investigashon di Konseho di Minister di Reino a instituí riba e konflikto entre direktor di Banko Sentral di Kòrsou i Sint Maarten i gobièrnu di Kòrsou. Ku institushon di e investigashon aki Konseho di Minister di Reino a demostrá bon kla ku no ta respetá Staten di Kòrsou sufisientemente, segun Asjes.

E presidente di Staten di Kòrsou a bisa mas aleu ku resultado dje elekshon di 27 di ougùstùs 2010 a anunsiá un fase nobo den e afan pa mas emansipashon di pueblo di Kòrsou. Segun Asjes, Kòrsou ke e mes prosedura pa realisashon di su independenshaor manera a inkorporá pa Statüt. Palabranan di Asjes tabata awa den mulina di parlamentario hulandes Eric Lucassen di PVV.
Emansipashon total
Lucassen a trese dilanti ku su partido ta e úniko un den Tweede Kamer o sea parlamentu hulandes, ku ke dal bai lihé ku emansipashon total di e islanan. "Statüt ta un prizòn pa nos tur. Mester lag'é bai, nos mester sali for di dje", asina Lucassen. Pero e pueblonan di e paisnan nobo no ta kla ainda, pa falta di konfiansa den nan mes polítikonan. Ta p'esei el a proponé pa pone korupshon i fayo di gobernashon na e islanan riba agènda. Helmien Wiels, miembro di Staten di Kòrsou i kabesante di partido Pueblo Soberano no tabatin ningun problema ku esei. “Pero e or'ei nos lo debatí sí riba korupshon den henter Reino”, asina Wiels a bisa. Ku eksepshon di Wiels, Lucassen no a risibí mashá sosten pa pone e punto akí riba agènda.
Pa Aruba superbibensia di Reino ta evidente. presidente di Staten di Aruba, Paul Croes a bisa den su diskurso di bonbiní ku mirando e eksperiensha ku 25 aña di Status Aparte, Aruba tin un papel i responsabilidat importante den konstelashon nobo di Reino hulandes. E pais ta konsiderá fortifikashon di e lasonan den Reino komo un desafio i gustosamente e ke desempeñá papel di pionero den e proseso akí.
Pais nobo Sint Maarten tambe ta ansioso pa koperá komo pais den e konstelashon nobo. Gracita Arindell, presidente di Staten di Sint Maarten a bisa di ta spera ku e deliberashon lo kondusí na un base sólido pa desaroyo duradero di pais Sint Maarten. E deliberashon interparlamentario entre Hulanda, Aruba, Kòrsou i Sint Maarten ta dura te ku djabièrnè 17 di yüni.
Brigitte van der Burg, presidente di e komishon Relashon di Reino, a hiba palabra na nòmber di Hulanda. Van der Burg ta spera un deliberashon 'konstruktivo i fruktífero', pasobra "nos tur huntu ta forma parti di Reino".