Doño di Robbie’s Lottery sospechá di froude

Ministerio Públiko a efektuá entrada hudisial den dos bibienda i seis kantor na Kòrsou i na Sint Maarten riba djamars 12 di yüli. Esaki den kuadro di un investigashon di froude ku impuesto, falsifikashon di dokumento i labamentu di plaka.

Tur e kantornan – tres na Kòrsou i tres na Sint Maarten – ta korespondé na e kadena di loteria di Robertico ‘Robbie’ dos Santos, doño di Robbie’s Lottery.

‘Bientu’
Banda di esaki tabatin entrada tambe den bibiendanan di Dos Santos i di su kosospechoso Kenneth L. Ku sosten di e Team Inlichtingen & Opsporing (TIO) e Recherche Samenwerkingsteam (RST) tin un tempu kaba hasiendo e investigashon akí yamá ‘Bientu’. Tur kaminda a konfiská dokumento.

Aparte di Dos Santos i L. “tin un kantidat di personanan hurídiko marká komo sospechoso, entre kual Caribbean Investment Group Ltd i Jamaroma Lotteries NV”, Ministerio Públiko ta mèldu.

Fuentenan ekstraofisial ta bisa ademas ku tin un eventual komplisidat den posibel práktikanan ilegal dor di Franco Corallo ku tin kasino riba e dos islanan via di su Atlantis Worldgroup.

Den eksterior
Parse ku Dos Santos ta den eksterior. No tin papiá (ainda) di un òrdu di aresto p’e – tampoko a arestá e otro sospechoso L. ku sí ta na Kòrsou.

Dos Santos – ku ta ruman pa parti di tata di minister di Finansas George Jamaloodin (MFK) – ta konsiderá komo un di e finansiadónan prinsipal di promé minister Gerrit Schotte su partido MFK. Lo a rekompens’é pa su sosten na e partido ku un puesto den direktiva di Fundashon Wega di Númber Kòrsou.