A kongelá loke Merka debe Dos Santos

Ku éksito outoridatnan merikano a kongelá mas ku 46 mion di dòler ku nan tabata debe doño di number Robertico ‘Robbie’ Dos Santos, i ku e tabatin riba su kuenta bankario na Florida. Na promé instante korte merikano a rechasá un petishon pa pone beslag riba e plaka akí.

Wes Colleen Kollar-Kotelly na Washington awor a duna órden pa kongelá tres kuenta bankario di Dos Santos. Petishon pa aktua komo tal a bini di Kòrsou.

Doño di Robbie’s Lottery ta metí den un investigashon penal ku ya ta dura tres aña. Den e investigashon akí Hustisia di Kòrsou ta akus’é di labamentu di plaka, froude fiskal i falsifikashon di dokumento.

Djabièrnè último Wall Street Journal a publiká parti di e petishon ku a dirigí na wes (klek aki pa mira e dokumento. Aki por lesa e desishon di 23 di ougùstùs referente na e petishon)

Argumentonan hurídiko
Djabièrnè ku a pasa e kaso a sali na kla ora un otro wes a eksigí argumentonan hurídiko supletorio pa por kongelá debenan na Merka riba petishon di un potensia den eksterior.

E demandantenan a argumentá ku éksito ku un adaptashon di lei ku a pasa e aña anterior ta duna Hustisia mas posibilidat pa kongelá debenan.